یہ تنہائی یہ عزلت اے دل اے دل

یہ تنہائی یہ عزلت اے دل اے دل
جوانی میں یہ حالت اے دل اے دل


نگر ہوتا تو کوئی بات بھی تھی
بیاباں میں یہ وحشت اے دل اے دل


بھلا کیا اس بھری دنیا میں تنہا
وہی ہے خوب صورت اے دل اے دل


کسے ہوتی نہیں اس کی ضرورت
مگر اتنی ضرورت اے دل اے دل


زمانہ چاہئے دل جیتنے کو
یہ بے تابی یہ عجلت اے دل اے دل


یہ آنسو ہیں کوئی موتی نہیں ہیں
لٹاتے ہیں یہ دولت اے دل اے دل


شعورؔ آیا ہوا بیٹھا ہے کب سے
یہ بے ہوشی یہ غفلت اے دل اے دل