تمہارا حسن جو محدود لا مکاں ہوتا
تمہارا حسن جو محدود لا مکاں ہوتا
سرور بادۂ الفت میں پھر کہاں ہوتا
بہار میں جو نہ اندیشۂ خزاں ہوتا
تو عیش دور بہاراں بلائے جاں ہوتا
وہ آ گئے تو کھلے ہیں جراحتوں کے چمن
وگرنہ درد کا احساس بھی کہاں ہوتا
نگاہ لطف کو ہوتی دل حزیں کی تلاش
کبھی تو یوں بھی محبت کا امتحاں ہوتا
یہ جشن صبح بہاراں یہ زرنگار کرن
کلی کے درد کا کوئی تو رازداں ہوتا
جہاں جہاں غم دوراں ہوا ضرور مگر
نہ ہو سکا غم جاناں کہ جاوداں ہوتا
