تلخئ حالات دوراں کا بیاں ہے زندگی

تلخئ حالات دوراں کا بیاں ہے زندگی
درد و غم کی اک مسلسل داستاں ہے زندگی


اللہ اللہ یہ سفر یہ راہ یہ دشواریاں
وقت کے شانوں پہ اک بار گراں ہے زندگی


جن کی ہلچل میں ہے طوفانی ہواؤں کا خروش
ان تڑپتی آرزوؤں کا جہاں ہے زندگی


شدت احساس ناکامی کی آتش گاہ سے
خرمن جذبات پر شعلہ فشاں ہے زندگی


ہے کسے اب زندگی کے درد پنہاں کی خبر
اپنی بربادی کی خود ہی راز داں ہے زندگی


یہ امیدوں کا چمن ہے رشک صد حسن چمن
اس چمن کی اک بہار جاوداں ہے زندگی


ہے اسی کے نور سے تابانیٔ کون و مکاں
ظلمت بزم جہاں میں ضو فشاں ہے زندگی


اس کی مرضی پر ہے ہر قید و رہائی منحصر
خود قفس ہے اور خود ہی آشیاں ہے زندگی


نقشؔ درد قوم ہے قلب و جگر میں شعلہ زن
جذبۂ اہل وطن کی ترجماں ہے زندگی