نکاح

شادی ایک مذہبی و سماجی معاہدہ ہے۔۔۔میاں بیوی ایک گاڑی کے دو پہیے ہیں۔۔۔کامیاب شادی کا راز سیرت النبی ﷺ سے۔۔۔۔

شادی کرنا شاید آسان ہو لیکن رشتہ تلاش کرنا ایک جہدِ مسلسل کا تقاضا کرتا ہے۔ معاشرے میں نکاح مشکل ہوتا جارہا ہے اور بدکاری کی راہ آسان۔ والدین کے لیے رشتوں کی تلاش جوئے شیر لانے کے مترادف ہے۔ ایسی کیا وجوہات ہیں کہ رشتوں کا مسئلہ مشکل ہوتا جارہا ہے؟ ہمیں کیا کرنا چاہیے؟

اولادکی نعمت تو خالق کا عطیہ ہے۔ وہ جسے چاہے لعل دے جسے چاہے گوہر سے نوازے۔ معاشرے کی ستم ظریفی ہے کہ معاشرے میں بیٹیوں کو بوجھ سمجھا جاتا ہے۔ جو زندگی والدین کے گھر میں گزارتی ہیں اس میں جب کوئی مہمان گھر آئے تو اس کی خدمت پر یہ مامور ہوتی ہیں۔ پھر یہ ہی مہمان سوالیہ انداز میں پوچھتا ہے کہ آپ کا بیٹا نہیں ہے ؟ اگر جواب "نہیں" میں ملے تو تاسف کا لمبا سانس کھینچتا ہے۔