نظم بھی گیت بھی نغمہ بھی غزل بھی تو ہے

نظم بھی گیت بھی نغمہ بھی غزل بھی تو ہے
میری سوچوں کا حسیں تاج محل بھی تو ہے


میری بیداریٔ احساس کا ضامن بھی تو
میرے پاکیزہ تصور کا بدل بھی تو ہے


تجھ سے منسوب ہیں خوشیاں بھی الم بھی یعنی
میری کمزوری بھی تو ہے مرا بل بھی تو ہے


تو ہی الجھن کا سبب ہے مرے حق میں لیکن
میری پیچیدگیٔ زیست کا حل بھی تو ہے


میری تہذیب کا آئینۂ بے داغ بھی تو
میرا کردار مرا حسن عمل بھی تو ہے


تیرے ہی دم سے ہے روشن مری دنیا جاناں
میرا سورج بھی مرا چاند کنول بھی تو ہے


صرف راقم کے سوا کچھ بھی نہیں تیرا خطیبؔ
تو غزل بھی سبب حسن غزل بھی تو ہے