نعت رسول مقبول ﷺ

ہر دم   درود  سرور   عالم    کہا    کروں

ہر لمحہ  محو  روئے   مکرم   رہا   کروں

اسمِ    رسول   ﷺ ہو  گا،  مداوائے  درد   دل

صل علٰی سے دل کے دکھوں کی دوا کروں

ہر سطر اس کی اسوۂ ہادی کی ہو گواہ

اس  طرح  حالِ  احمدِ  مرسلﷺ  کہا  کروں

معمور  اس  کو  کر  کے  معرا  سطور  سے

ہر کلمہ اس کا دل کے لہو سے لکھا  کروں

گو  مرحلہ گراں ہے، مگر  ہو رہے  گا طے

اسم  رسول  سے ہی درِ دل  کو  وا  کروں

ہر دم رواں ہو دل سے  درودوں کا سلسلہ

طے اس طرح سے راہ کا ہر مر حلہ  کروں

دے  دوں   اگر   رسول  مکرم  کا  واسطہ!

دل کی  ہر  اک  مراد  ملے،  گر  دعا  کروں

اس کے علاوہ سارے  سہاروں سے ٹوٹ کر

الله   کے   کرم   کے   سہارے   رہا کروں

ہو کر  رہے گا  سہل،  ہر اک  مرحلہ  کڑا

الله    کے    کرم    کا    اگر    آسرا    کروں

اردو   کو   اک   رسالۂ   الہام    دوں    ولی

لوگوں  کو  دور   ہادئِ  عالم   عطا   کروں