نہ پوچھ اے ہم نفس افسانۂ رنج و محن میرا
نہ پوچھ اے ہم نفس افسانۂ رنج و محن میرا
نہ ہے بس میں زباں میری نہ قابو میں دہن میرا
شمیم زلف نے مہکا دیا دل کا ہر اک گوشہ
جو بکھریں یار کی زلفیں بنا پلو ختن میرا
ستا لے جتنا جی چاہے مگر اتنا سمجھ رکھنا
رسا ہوگا کبھی تو نالہ اے چرخ کہن میرا
نہ دامن ہی سلامت ہے نہ جیب و آستیں باقی
ہوا ہے نذر خار دشت سارا پیرہن میرا
ہرے پھر کر دئے زخم جگر ابر بہاراں نے
ہوا شاداب دو چھینٹوں میں یہ اجڑا چمن میرا
وہ کہتے ہیں کہو جو کچھ تمہیں کہنا ہو اے کیفیؔ
مگر طاقت کہاں سے لائے کہنے کی دہن میرا
