مولانا محمد علی جوہر
مجاہدین وطن میں شمار ان کا ہے
ہر ایک قول و عمل یادگار ان کا ہے
ہے یاد قوم کو وہ داستاں شجاعت کی
چلائی آپ نے تحریک جب خلافت کی
وہ حریت کا پرستار قوم کا رہبر
خدا نے قوم کو ایسا عطا کیا جوہر
وہ قید و بند کی جھیلی ہیں سختیاں جس نے
اڑائیں جبر و غلامی کی دھجیاں جس نے
وہ اہل درد و سخنور وہ بے مثال خطیب
سیاسیات کا ماہر صحافی اور ادیب
محمد اور علی کا ہے فیض روحانی
کہ ان کا نام جہاں میں رہے گا لا فانی
