جاوداں خواب

جاوِداں خواب

ان کہے خواب کہِیں

اور کہِیں دُور

کسی دیس کے راہی سے بیاں خواب

جیسے اک جھیل کے ساحل پہ گزرتا ہوا وقت

ڈھلتے منظر میں دسمبر کی کوئی آخری شام

جیسے پت جھڑ میں اچانک ہو بہاروں کا ہجوم

دِل کی دیوار پہ لِکّھا کِسی محبوب کا نام

جاگتی آنکھ کے خواب

اور کہِیں

دِن کے اُجالوں میں نِہاں خواب

جاوِداں خواب

راہروِ  زیست کے ہاتھوں سے پِھسلتی منزل

یاس آمیز نگاہوں میں دھڑکتے ہوئے دِل

ڈوبتی ناؤ کی آنکھوں سے سِرَکتا ساحِل

بھیڑ میں دیر سے تنہا کوئی جانِ محفل

سُرخرُو خواب کہِیں

اور کہِیں

اشکِ بیتاب بھرے  نوحہ کناں خواب

جاوِداں خواب

حاکمِ وقت سِتم کیش کہِیں مِثلِ یزید

عشق کا خون بہانے کو چلا لشکرِ شام

سِبطِ محبوبِ خدا جور کے نیزے پہ بلند

اپنی اک ذات میں تنہا کوئی جرّار امام

سرنِگوں خواب کہِیں

اور کہِیں

نوکِ سناں ، حرفِ اذاں خواب

جاوداں خواب

۔۔۔۔

حماد یونس