چمکو چمکو پیارے تارو

چمکو چمکو پیارے تارو
رنگوں اور امیدوں والے
آنکھوں میں پھر خواب اتارو
چمکو چمکو پیارے تارو
رات بہت ہے کالی کالی
گلیاں ہیں سب خالی خالی
ہوا چلے تو ڈر لگتا ہے
سونا سونا گھر لگتا ہے
روشن سارے منظر کر دو
دنیا کو خوشیوں سے بھر دو
چمکو چمکو پیارے تارو
چپکے سے کھڑکی میں آؤ
اچھے اچھے گیت سناؤ
سب سے بچ کر سب سے چھپ کے
بات کریں گے چپکے چپکے
بادل سے تم دور ہی رہنا
جو کہنا ہو ہم سے کہنا
چمکو چمکو پیارے تارو
رنگوں اور امیدوں والے
آنکھوں میں پھر خواب اتارو
چمکو چمکو پیارے تارو