برس گیا بہ خرابات آرزو ترا غم
برس گیا بہ خرابات آرزو ترا غم
قدح قدح تری یادیں سبو سبو ترا غم
ترے خیال کے پہلو سے اٹھ کے جب دیکھا
مہک رہا تھا زمانے میں چار سو ترا غم
غبار رنگ میں رس ڈھونڈھتی کرن تری دھن
گرفت سنگ میں بل کھاتی آب جو ترا غم
ندی پہ چاند کا پرتو ترا نشان قدم
خط سحر پہ اندھیروں کا رقص تو ترا غم
نخیل زیست کی چھاؤں میں نے بہ لب تری یاد
فصیل دل کی کلس پر ستارہ جو ترا غم
طلوع مہر شگفتہ سحر سیاہئ شب
تری طلب تجھے پانے کی آرزو ترا غم
نگہ اٹھی تو زمانے کے سامنے ترا روپ
پلک جھکی تو مرے دل کے روبرو ترا غم
