بگیا لہولہان

ہریالی کو آنکھیں ترسیں بگیا لہولہان
پیار کے گیت سناؤں کس کو شہر ہوئے ویران
بگیا لہولہان


ڈستی ہیں سورج کی کرنیں چاند جلائے جان
پگ پگ موت کے گہرے سائے جیون موت سمان
چاروں اور ہوا پھرتی ہے لے کے تیر کمان
بگیا لہولہان


چھلنی ہیں کلیوں کے سینے خون میں لت پت پات
اور نہ جانے کب تک ہوگی اشکوں کی برسات
دنیا والو کب بیتیں گے دکھ کے یہ دن رات
خون سے ہولی کھیل رہے ہیں دھرتی کے بلوان
بگیا لہولہان