اے بے دلو حریف شب تار کیوں ہوئے
اے بے دلو حریف شب تار کیوں ہوئے
کچی اگر تھی نیند تو بیدار کیوں ہوئے
صحرا کو آج کوستی پھرتی ہیں آندھیاں
دیوانے گلستاں کے طرف دار کیوں ہوئے
سست اعتباریوں کو نہیں تاب انتظار
وعدے سحر کے صرف شب تار کیوں ہوئے
شرما گیا چمن میں تبسم بہار کا
ہم گل فروش زخم دل زار کیوں ہوئے
کیا گلستاں میں تھی سفر آمادہ بوئے گل
جھونکے ہوا کے قافلہ سالار کیوں ہوئے
اے زندگی نقاب الٹ کر جواب دے
فن ہم سے پوچھتا ہے کہ فن کار کیوں ہوئے
