احمد قریشی نے اسرائیل کا دورہ کیوں کیا؟

احمد قریشی کو اسرائیل کا دورہ کرنے پر پاکستانی حکومت نے پی ٹی وی کی نوکری سے نکال دیا۔ حکومت پاکستان کا موقف ہے کہ صحافی ذاتی حیثیت سے اسرائیل کے دورے پر گئے۔ احمد قریشی کون ہیں اور وہ اسرائیل کیا کرنے گئے تھے؟

احمد قریشی کون ہیں؟

احمد قریشی کویت میں پیدا ہوئے، وہاں رہے اور عربی بولتے ہیں ۔عرب سیاسی اور معاشی معاملات پر گہری نظر رکھتے ہیں۔ وہ لبنان، کویت، عراق اور فلسطین سمیت کئی کئی عرب تنازعات کی کوریج کرچکے ہیں۔

 ان کی ٹویٹر پروفائل کے مطابق وہ مینا MENA  ریجن یعنی عرب اور مشرق وسطیٰ کے ممالک کی قومی سلامتی اور انسانی حقوق کے معاملات کی کوریج کرنے کے لیے مشہور ہیں۔ وہ 1975 سے صحافت کے شعبے سے وابستہ ہیں لیکن پاکستانی میڈیا پر وہ سن 2000ء میں جنرل مشرف کے دور میں نمایاں ہوئے۔

سینئر صحافی نصرت جاوید اپنے گزشتہ روز ائع ہونے والے ایک کالم میں احمد قریشی کے بارے میں لکھتے ہیں:

"احمد قریشی ایک متحرک آدمی ہیں۔ ٹی وی سکرین پر رونق لگانے کی صلاحیتوں سے مالا مال۔ خوب صورت اور رواں انگریزی لکھتے اور بولتے ہیں۔ عربی زبان پر کامل گرفت کے بھی حامل ہیں۔جنرل مشرف کی جانب سے اقتدار سنبھالنے کے بعد بطورصحافی نمایاں ہوئے تھے۔"

احمد قریشی کیسے اسرائیل پہنچے؟

حالیہ دنوں  احمد قریشی کا نام اس وقت نمایاں ہوا جب پاکستانی نژاد امریکیوں کےایک وفد کی اسرائیل کے دورے کی خبر آئی۔ اس وفد میں پاکستانی صحافی احمد قریشی بھی شامل تھے۔

پاکستانی نژاد امریکیوں کی تنظیم امریکن مسلم اینڈ ملٹی فیتھ وومنز امپاورمنٹ کونسل کے وفد نے رواں سال مئی کے دوسرے ہفتے اسرائیل کا دورہ کیا۔ اس وفد میں شامل پاکستانی نژاد امریکی انیلہ علی کا کہنا ہے کہ یہ دورہ بین المذاہب ہم آہنگی اور امن کے قیام کے لیے کیا گیا۔ البتہ پاکستانی میڈیا پر اس کے تانے بانے پاکستان اور اسرائیل کے تعلقات استوار کرنے کے لیے سرگرم لابی سے جوڑے جارہے ہیں۔ اس وفد میں احمدی قریشی کے علاوہ ایک پاکستانی یہودی فِشل بن خالد (فیصل بن خالد) بھی شامل تھے۔ جس کے بارے میں دعویٰ کیا جارہا ہے کہ اس کے پاکستانی پاسپورٹ پر خصوصی اجازت کے تحت یروشلم لکھا گیا۔

اس امریکی تنظیم نے ٹویٹر پر اس دورے کے بارے لکھا

اسرائیلی اخبار یروشلم پوسٹ نے احمد قریشی سے متعلق فرنٹ پر ایک سٹوری چھاپی ہے۔ اس رپورٹ کے مطابق احمد قریشی بیس سال سے عرب ورلڈ کو کور کر رہے ہیں ۔ کئی اسرائیلی اخبارات نیوز سائٹ پر چھپتے رہے ہیں ۔ کئی اسرائیلیوں کے انٹرویوز کر چکے ہیں۔ فلسطین اسرائیل تنازعہ کور کرتے رہے ہیں۔

لیکن پاکستانی میڈیا پر اس وقت نمایاں ہوئے ہیں جب انھوں نے حال ہی میں اسرائیل کا دورہ کیا ہے۔ ان کے دورے کو اسرائیل کے ساتھ تعلقات استوار کرنے کی ایک کوشش قرار دیا جارہا ہے۔ لیکن حکومت پاکستان نے اس الزام کی تردید کی ہے۔

احمد قریشی کو پی ٹی وی کی نوکری سے ہٹا دیا گیا

احمد قریشی پی ٹی وی نیوز "ریاست" نام سے ٹاک شو میں بطور اینکر پرسن کام کررہے تھے۔ حالیہ تنازعہ کی وجہ سے ان کو پی ٹی وی نوکری سے ہٹا دیا گیا۔

وفاقی وزیر اطلاعات مریم اورنگزیب نے اپنے ایک ٹویٹر پیغام میں احمد قریشی کو پی ٹی وی کی نوکری سے برخاست کیے جانے کی خبر دی۔  مریم اورنگریزیب کا کہنا تھا کہ دورے میں شامل پی ٹی وی کے اینکر کو ٹرمینیٹ اور آف ائیر کردیاگیا ہے مذکورہ اینکر اپنی ذاتی حیثیت میں دورے پر گیا تھا

احمد قریشی نے آج ایک ٹویٹ میں اسرائیل کے وزٹ کی وضاحت کرتے ہوئے لکھا ہے کہ انھوں نے بحثیت صحافی اور بین المذاھب مکالمہ کے علمبردار کے اسرائیل کا دورہ کیا۔